ابوذیات/الشاعر الأهوازی الکبیر المرحوم اوداعه البریهی

img
ما يحصل دوه للداي يا داي
الفطر چبدی ونزف كل وكت يا داي
العليهم چنت امد اثنین یا داي
الدهر خان وغدوا تحت الوطية
******
من اهيمن لرض بيده من يلمني
شداوي جرح گلبی من يلمني
انا حامد الهدمي من يلمني
ما يحترج من ناري السرية
******

احمول اثگال عندي من يشلها
كثيره اجروح گلبی من يشلها
هل غرگان گلی من يشلها
ابغبه وزود عالي وغزر مية
******
انا اشما ثگلن احمولی یشلها
اجروح البلگلب حاضر یشلها
الو طحت اببحر طامی یشلها
بس اندب علي حامي الحمية
******
سواهه الدهر وياي يوله
ولا عنده رحم لو راد يوله
العنده اخوان بالشدات يوله
اخواني ويه الدهر هدوا عليه
*****
اشيفيد ابچاچ من تبچین يماي
طريح ولا من الخوان يماي
بگیت انهت من عطشان يماي
ابچالی والشرب یصعب علیه
******
الحمد لله علی هلحال ورده
ولو جسمی یبس بالعود ورده
ارید اهناک انا من الحوض ورده
من ابو الحسنین ابو اچفوف السخیه
******
حمام الدوح حني ما تحنه
الظهر لو ما فراگک ما تحنه
احلفت للموت چفی ما تحنه
لمن شخصک یرد سالم علیه
*****
هم تدری علیک اشکثر حنیت
اضلوعی والظهر بجفاک حنیت
ابیوم العاد شخصک علي حنيت
اچفوفی والیود فرحان لیه
******
یحگ لی لو سکنت البید والهام
صبر بلچن یطیب الالم والهام
عمری 14 یا ناس والهام
شیب من کثر هضم العلیه
******
یحگ لی لو همل جفنی وکتلای
دمع من حیث ما یصفه وکتلای
وکت تجری علیه غصه وکتلای
امنازع دونها وتدنه المنية
******
رخصت الدمع من عيني بهالاي
السبب روحي الدهر خلف بهالاي
ذكرت اديارنه الچانت بهالای
مزهره وصبّحت منهم خلية
******
شهم شطحل شدگن صبر شلهم
العواذل والدهر ویای شلهم
عمامی الما تخیط فتگ شلهم
هضم لو شلته الایناب لیه
******
اصافح للدهر وانگاد ویناب****اصیح ولا من الخوان ویناب
یلاعبنی شمال وشرق ویناب****امکارب نوب الي نوب العليه
******
اصيح اعلى الزمان وما يصح لي****وخوي اليشرك ابهمي ما يصح لي
الطبيب امتحن بيه ما يصح لي****جرح عندي غزير وعمل بيه
******
يدهري اشما ردت تولي ولك حيل****ابزودك والذي تملك ولك حيل
الكديش ابساعته يبين ولك حيل****يطلعه اضراعه يوم الموزمية
******
اچفوفی دوم للطیبین یومن****ولا ریده العشرته یوم یومن
کثیره الگلت بی منین یومن****ابیوم الصدگ ما یصفه وجیه
******
رجال الما حمت بالضیج یرها****وزنهم خف ولا ظن بعد یرها
کثیر الگال انا عیناک یرها****علی کنداقها وسلم خطیه
******
بچیت ودمعتی زادت بسلها ****وصرت شبه البلع نخله بسلها
کثیر الگال انا اعگالک بسلها****گفه واترک حمله اعلی الوطیه
******
یصاحب شوف جرح الگلب شده****علیک وطیبته ابیمناک شده
ردتک من تصیر وياي شده ****گبل لا یگع حملی اتمر علیه
******
وحگ عقدالولایه مره سلها****مره اغمت اجفونی مره اسلها
مره اتضیج روحی مره اسلها****ابزاچی اللبن من یجبل علیه
******
حلات الرجل بالشدات ینهم ****اسد وگصه ابصدور اعداه ینهم
جبیله لو یصیر الکون ینهم****لرض قفره ولگه احتوف المنیه
******
تشهد لی الغرب والحاط یمنه****ومهوه چنت للخطار یمنه
الیسره ما تطگ من غیر یمنه****شلت یمنای بس العچس لیه
******
تبعت الظعن واصرخ والحدایه****وچتفونی ابسلاسل والحدایه
اشیل الحمل کله والحدایه ****اعجزت من ذبوا المنخل علیه
******
علیش اتلومنی للظعن چبریت****السبب لن علتي بحشای چبریت
من یمناک اریدن فرد چبریت ****واچمل النار البگلبی السریه
******
الدهر بالک من افعاله ولوزر****معاون ما یخلیله ولو زر
اظل ابطرگ مزویتی ولوزر****ولا فرگه العمام اتمر علیه
******
ذلي اخلافهم يا روح ذلي****عمامي وهيبتي وبالضيج ذلي (ظلي من الظلال)
ابيوم الكون اداوي ازمول ذلي****احدي والحمل عدهم تحيه
******
الدهر چمدوب اسامحله وعدله****السبب ما ینفض ایویده وعدله
البشر مکتوب من ربه وعدله****الدهر یخسه الصبر واجب علیه
******
راح الچان بیه الگلب یمن****وعلیه من دم دموع العین یمن
اشو ذبنی زمانی النوب یمن****البد وفه وما بیه حمیه
******
يا دهري شو يبت خيلك ولكدن****عليّ احساب تطلبني ولكدن
انچان اترید تنصفني ولكدن****الیسر گد العسر وعطف علیه
******
ولاني الدهر يا احبابي منا شاب****لما بين شعر راسي منا شاب
اشمريد اصعد مثل ربعي منا شاب****الحواييز اتغدي حسره عليه
******
بدينه لجل ابو عيسى بدينه ****ابفرح واسرور ومطالس بدينه
چنت مطلوب وارد اوفی بدینه ****ابرگبتی لو قبل مني هديه
******
الرجل لو عاف اخوته وتبع ماله ****گعده ویه الزلم بالسلف ماله
الجمعهم ابیوم الکون ماله ****گوه عزمه وکسر بیهم سریه
******
اطحنی فوگ لب احشای یرحای ****والچمی السومر من اسنین یرحای
یکره اعلی الذیاب النوب یرحای ****وابتری ابدال لیتچ تسع میه
******
وکتی نوب صاحی ونوب عی بی ****اظن صارت لعند الخلگ عی بی
یکره ذاک ابو سرحان عی بی ****ایتهوم خاف یشرد له ابنویه
******
عبدک واشتکی عندک یباری****طریح ومحد من اهلی یباری
المکسور من غیرک یباری ****وانت اشفق من الوالد علیه
******
النخیته قادر من الولم یبراک****ولو مکسور عنده سهل یبراک
رب الخالجک کل وکت یبراک ****ابسعاده وخیر وبجنته الهویه
******
من همی یلوي الطفل ويشاب****غديت الهم دجيج الصبر ويشاب
حلو الي ربيت وياه ويشاب ****شباب اهوه وانا الشيبات بيه
******
انا الشيبات بيه قهر يوهم ****وبعد لحد يلوم الگلب یوهم
انا المحد علیه برم یوهم ****وهسه کثرن الطگات بیه
****
علیه کثرن الطگات والیور ****اخوتی ولا صدیق انتغر والیور
امعاتت ما یفیده الدهر والیور ****السماحه اتصیر ذل ومهضمیه
******
علی الزینین یا روحي تراداي****بچیت ودم دمع عینی تراداي
الاسف شیفید یا احبابی تراداي ****امچتف هل وکت غصباً علیه
******
یعت بیه الدهر يهلي وناعت****الخنسه ما تون ونتي وناعت
النذل ما عيب اقصدنه وناعت****بل يكره العتب ويحن عليه
******
شوف الأشد والأعظم ولدها ****نصيبي للحلگ توصل ولدها
صرت مثل الذی امضیعه ولدها****امخرطه اخدودها وتلطم شجیه
******
وحگ من خالج العسره یسرنه****جنابک من قصد لینه یسرنه
اشما تجبل علي واجب يسرنه ****اضلوعي وكل قدم حدره تحيه
******
الك يلما علي مريت مره ****اریاگی اصبحت من فرگاک مره
شعاین شفتکر شرتچب مره ****ابهواکم مبتلي وروحي شجيه
******
وقال باقر الغرابي حين رأى وداعة يبيع القماش:
وحگ البلحسن موصوف جمله ****امبسط بالعجد ویصیح جمله
وداعه الما اله بالروض جمله ****اشمعنه بالوصل یبخل علیه
وقال وداعه:
الك مرسول يا سيد يملنا****وما ظنتي اليعاشرنه يملنا
انا البل روض كل وكته يملنا***نهض للطاح حمله وگطع فیه
وقال أيضاً:
عرفتوا سيف الابيمناي وشره****مسگی ومحد ما یحتای وشره
یسید حتی جدک باع وشره****ولا یطلب من الذاته ردیه
******
احبن کل شجاع وطلج یمنه****وصدیجه لو قصد بحشاه یمنه
اظنن ما یخیب ارباچ یمنه ****الیخیب ارباه ابو افعال الردیه
******
اهموم الناس نص حگه وناتل****وچتفنی الدهر یا صاحب وناتل
الچانوا لیوره جدموا وناتل****السبب خانوا عمامی وگصوا بیه
******
ما تنشد علیه اشکثر منهم****وهمت بالبید کالمجنون منهم
الذنب مو من زمانی اعتقد منهم ****عمامی الخالفوا وگطعوا بیه
******
ما تنشد علیه اشصار وجره ****بچیت وسال منی الدمع وجره
شطر سیفه علیه الدهر وجره****اهو بسلاح وآنه اشگف بدیه
******
الک ود ابوسط گلبی ولک هم****نحل وانفت علی افراگک ولک هم
الک تعتب علي واجب ولک هم ****اببياب العين اودیلک تحیه
******
بچیت وفاضت من الدمع بیدای****السبب گلبی من الخوان بیدای
اخاف النوب اگص یمنای بیدای****الیسره ما تشیل الحمل لیه
******
عکس جبله وشمال وغرب وشراگ****مربع صار طر الگلب وشراگ
خفج میلی ابوسط البحر وشراگ****ایسدره المد یجیبه الیزر لیه
******
ابهدوت اللیل الوح ابظهر یلفای****الما عنده ابو یا صوب یلفای
چنت ابگوش هسه النوب یلفای ****اهومش والیرف مبعد علیه
******
اشما العب مع المخلوگ شاچی ****انغلب والجسم من الهضم شاچی
ارید اگصد وصیح ادخیل شاچی****عند اهل العبا الخمسه الشفیه
******
من اگولن چای گول احضرت چایین****الگلب لو ما یلزمه الصبر چایین
الو سمعن ونینی السمر چایین****البچی الهن والونین ایصیر لیه
******
صدگ عینک الی یا خوی وربه****غده گلبی علیک 12 وربه
اطلبک من حلیب اغذاک وربه ****مثل ما حنت امک حن علیه
******
خلف شخصک سهرت اللیل ونطر ****افراگک حز ضمیر احشای ونطر
همت لجلک سألت الطیر ونطر ****اودیلک سلام وبیه تحیه
******
وینه الی یسلی الروح بنای ****ویشبعنی طبیخ وسمچ بنای
اصیر ویاه انا من الصبح بنای****وسد الحوش اله غصباً عليه
******
دخيل الي يدير الحال بلحال****الیچتفه الدهر گلی اشلون بلحال
آنه الدون منی صفوا بلحال****تعلوا بلشماته النوب بیه
******
الدهر خوان بفعاله وفتنی****قهرنی وذوب افادی وفتنی
اخوتی الی وفیت الها وفتنی ****ابرده ولا شوف الی بیهم تچیه
******
خله الدهر یسحگ خله خله ****علی وثر ابگلبی خله خله
الخلیل اشلون یصبر خله خله****جفه وسارت اظعونه وگطع فیه
******
ادور عل یدوس الخطر ولفای ****وحرت یا ناس بین الشمس ولفای
طحت ما بین دهری وبین ولفای ****تسلم یلتگول اگبل علیه
******
ارید اگصد لذیذ الزاد ولمای****نحیل وصعد بلدلال ولمای
ابعدوی ما یصح لی اطراگ ولمای ****ودور کل شجاع وبیه حمیه
******
الدهر یحلب علیه وآنه حل به****انعجد دلال گلبی وآنه حل به
ایدرها الثور یمته وآنه حل به****اخضن واطلع الزبده وجیه
******
العواذل فتگوا شلتی ولیراب****الهزله احتچت ابزوری ولیراب
یشامت هم الی حوبه ولیراب ****المشه ویای ابرده ایطیح ابهبیه
******
الک یلخلفت بالگلب خله****ثگل همی وهمک عليّ خله
العزم بالله الخليل ايعود خله****انتلاگه بالهنا ونگعد سویه
******
حمامه اتنوح متگلی شطرها****اظن سیف الشطر گلبی شطرها
ابیوت البلفله امشیده شطرها ****الدهر واثر کثیر النوح لیه
******
اشتذکر هلحمامه اتنوح بالهیم****وعلی درب الاحباب الگطع بالهیم
شجیه اهیه وشریکه ویای بالهیم****افگدت خلها وانا الشحوا علیه
******
ارید انهض وحف الجدم وخطه****ومیل عن جمیع اذنوب وخطه
للاسمه انکتب بالعرش وخطه ****محمد للنجات من الاذیه
******
وحگ من طاف بیت الله وحی بی ****معرض للگصد وگبل وحی بی
النذل مالی غرض عنده وحی بی ****عتابی اعلی البذل روحه الخویه
******
یا گلبی لا تعوف الصبر وتمل****ولو همک ثگل حمرین وتمل
تره الدنیا غرور ویاک وتمل****افتکر چم حید ضمته الوطیه
******
بعد ما آمن الدنیا واملها****ابسبب کل یوم تومیلی واملها
سفنها کل وکت تطرخ واملها ****الی ساعه التذب انیر علیه
******
گلبی ایفور کلتنور حامای ****الگبل چانوا حمه ایریدون حامای
یروحی النوب علی فوگ حامای****ابوسط لا للسما ولا للوطیه
******
غدرنا الدهر یا صاحب غدرنا****وبعضها الناس ما تعرف غدرنا
تبدد ماینا وشفت غدرنا****الدهر واهل الوفه خانوا سویه
******
الدهر بنزول من صوبی لچنه****نهشنی وخلف نیبانه لچنه
لعبت ولا من اچعابی لچنه ****صولی وخذوا ترماقی من ادیه
******
تحیینا ابفرح لسمک وصلنا****لجل عیناک لا تگطع وصلنا
عساهه اتدوم خوتنه وصلنا****بحگ المرتضی حامی الحمیه
******
وحگ اللی عليّ بالمهد لالت****ابذچرکم دمعتی بالعین لالت
عسه الیال المظن یا خوي لالت ****انفردنه وكل قسم صار ابنويه
******
اعتقد حتی السما من الظلم یحمر****وابو ارویشد ابلحم السبع یحمر
شیل الذیل وانهگ حیل یحمر****الوکت وکتک صفه یبن المطیه
******
تهوی الروح ما یحصل یدلها****على اهل المجد من اب يدلها
شوف الخنفسه مدت يدلها****تريد ويه الوذن توگف سویه
******
جفنی ما غمض للنوم وراگ****وغدیت التاذ بلریجان وراگ
المرایل صفت للعگروگ وراگ****وابو الزمیر مد سیفه علیه
******
یا گلبی من الهموم اتلول وسر****ابسبب ما تکتم السهلات وسر
الما یدهن احبال الوصل وسر ****جرم ویروح کل وصله ابنویه

Author : أنا مثقف الأهواز

أنا مثقف الأهواز

RELATED POSTS

Comments are closed.

تطبيق الواتساب
1
تواصل معنا عبر تطبيق الواتساب
مرحباً
تواصل معنا عبر تطبيق الواتساب
او ارسل لنا رسالة عبر البريد الأكتروني التالي:
anamothaqaf@gmail.com